Azərbaycanın özünün son illərdə nail olduğu inkişaf göstəriciləri, respublikamızın regionda lider dövlətə çevrilməsi, habelə ölkəmizin hər bir sahədə müstəqil siyasət yeritməsi və enerji siyasətində Avropa məkanı ilə əməkdaşlığa xüsusi önəm verməsi də ölkəmizin tərəfdaşlıq qismində müsbət beynəlxalq imicini formalaşdıran mühüm faktorlardandır. Malik olduğu zəngin karbohidrogen ehtiyatları sayəsində Avropanın enerji təhlükəsizliyinin təminində əvəzolunmaz mövqeyə sahib olan Azərbaycanda yaradılan əlverişli biznes mühiti və geniş iqtisadi inkişaf potensialı da respublikamızın tərəfdaş ölkələrlə daha sıx əməkdaşlığına imkan verir.
Azərbaycan müstəqillik əldə etdikdən sonra bir sıra ölkələrlə, o cümlədən, Şərqi Avropa ölkələrindən biri olan Slovakiya ilə əməkdaşlığa xüsusi önəm verir. Bu da səbəbsiz deyil. Şərqi Avropa ölkələri ilə əməkdaşlıq Azərbaycanın Avropaya inteqrasiyası prosesindəə mühüm rol oynamaqdadır.
Mayın 7-də ölkəmizə rəsmi səfərə gələn Slovakiya Respublikasının Baş naziri Robert Fitso ilə keçirilən görüşdən sonra Azərbaycan Respublikasının Prezidenti İlham Əliyev və Slovakiya Respublikasının Baş naziri Robert Fitso mətbuata bəyanatlarla çıxış ediblər.
Ölkəmizin başçısı Bəyanatında qeyd etmişdir ki, “Hesab edirəm ki, bu gün Slovakiya-Azərbaycan əlaqələrində yeni səhifə açılır və ümid edirəm, bizim müştərək yolumuz çox uğurlu olacaq.”
İmzalanan sənədlər arasında müdafiə və müdafiə sənayesi sahələrinə aid sənədlərin olduğunu qeyd edən ölkəmizin başçısı müdafiə sənayesi sahəsində birgə istehsal sahələrinin yaradılması haqqında artıq konkret danışıqlara start verildiyini bildirmiş və bunu yüksək qiymətləndirmişdir.
Cənab İlham Əliyev bildirmişdir ki, “Təbii ki, bu gün energetika sektorundakı əməkdaşlıq çox geniş müzakirə edilmişdir. Azərbaycan hazırda 8 ölkəyə öz təbii qazını ixrac edir və ümidvaram ki, 9-cu ölkə Slovakiya olacaq. Keçən ilin aprel ayında “Həmrəylik Halqası” adlanan sənəd imzalanmışdır və beləliklə, Azərbaycan qazını Slovakiya bazarına da nəql etmək üçün yaxşı imkanlar yaradılmışdır.”
Avropa ölkələri ilə təmasların yüksələn xətlə inkişaf etdirilməsi uğurludur. Dostlarımız, tərəfdaşlarımız çoxaldıqca həm Avropada, həm də dünya birliyində mövqelərimiz də möhkəmlənir və dünya birliyinə inteqrasiya prosesi güclənir. Bu da ilk növbədə cənab Prezident İlham Əliyevin həyata keçirdiyi xarici siyasətin uğurlu davamı və diplomatiyamızın qələbəsi hesab edilməlidir. Əməkdaşlıq edilən ölkələrlə səmimi dialoq, qarşılıqlı anlaşma və ilk növbədə etibarlı tərəfdaşlıq bu siyasətin əsasını təşkil edir. Əməkdaşlıq edən ölkələr Azərbaycanı, onun dövlət başçısını məhz belə tanıyır və qəbul edirlər.
Rüstəm Nağıyev,
YAP Gədəbəy rayon təşkilatının sədri
